ເປ​ຕັງ​ລາວ ຖ່ອມຕົວ ຫວັງພຽງ​ 1 ຫຼຽນຄຳ ໃນຊີ​ເກ​ມ ຄັ້ງ​ທີ 29 ທີ່​ມາ​ເລ​ເຊຍ

ເປ​ຕັງ​ລາວ ຖ່ອມຕົວ ຫວັງພຽງ​ 1 ຫຼຽນຄຳ ໃນຊີ​ເກ​ມ ຄັ້ງ​ທີ 29 ທີ່​ມາ​ເລ​ເຊຍ

ທັບ​ນັກ​ໂຍນ​ລູກ​​ເຫຼັກ​ທີ​ມຊາດ​ລາວ ​​ເຈົ້າຂອງ 4 ​ຫຼຽນ​ຄຳ​ກິລາຊີ​ເກ​ມ ຄັ້ງທີ 27 ທີ່​ສະຫະພາບ​ມຽນມາ ປີ 2013 ຖ່ອມຕົວ ຕັ້ງຄວາມ​ຫວັງ​ໄວ້​ພຽງ 1 ຫຼຽນ​ຄຳ ​ໃນ​ການເຂົ້າ​ຮ່ວມ​​​ງານ​ມະຫາ​ກຳ​ກິລາ​ຊີ​ເກ​ມ ຄັ້ງ​ທີ 29 ທີ່​ປະ​ເທດ​ມາ​ເລ​ເຊຍ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 19-31 ສິງຫາ 2017.

ຕາມ​ການ​​ເປີດ​ເຜີຍ​ຂອງ ທ່ານ ​ແສງ​ເພັດ ສີ​ບຸນ​ເຮືອງ ຄູ​ເຝິກ​ກິລາ​ເປ​ຕັງ​ທີ​ມຊາດ​ລາວ ​ແຈ້ງ ​​ວ່າ: ອີງ​ຕາມ​ການ​ແຈ້ງ​ຂອງ ກົມ​ກິລາ​ລະດັບ​ສູງ ກະຊວງ​ສຶກສາທິການ ​ແລະ ກິລາ ກຳນົດ​ໃຫ້​ສະຫະພັນ​ເປ​ຕັງ​ແຫ່ງ​ຊາດ​ລາວ ກະກຽມ​ຄວາມ​ພ້ອມ​ທັບ​ນັກ​ກິລາ​ເປ​ຕັງ​ທີ​ມຊາດ​ລາວ ​​ຈຳນວນ 16 ຄົນ , ຍິງ 8 ຄົນ ສົ່ງ​ເຂົ້າ​ຮ່ວມງານ​ມະຫາ​ກຳ​ກິລາ​ຊີ​ເກ​ມ ຄັ້ງ​ທີ 29 ທີ່​ປະ​ເທດ​ມາ​ເລ​ເຊຍ ຮັບ​ກຽດ​ເປັນ​ເຈົ້າພາບ. ດັ່ງ​ນັ້ນ​, ຈຶ່ງ​ໄດ້​ມີ​ການ​ຄັດ​ເລືອກ​ນັກ​ກິລາ​ຜູ້​ທີ່​ມີ​ຄວາມ​ສາມາດ​ດີ​ເດັ່ນ​ຕາມ​ເປົ້າ​ໝາຍ ພ້ອມ​ທັງ​ເກັບ​ຕົວ​ເຝິກ​ຊ້ອມ​ໃນ​ຕົ້ນ​ເດືອນ​ພຶດສະພາ​ ຜ່ານ​ມາ ທີ່​ສະໜາມກິລາ​ເປ​ຕັງ​ແຫ່ງ​ຊາດ ວິທະຍາ​ເຂດ ດົງ​ໂດກ ​ເມືອງ​ໄຊ​ທານີ ນະຄອນຫຼວງ​ວຽງ​ຈັນ ​ໂດຍ​ໄດ້​ມີ​ການວາງ​ແຜນການ​ເຝິກຊ້ອມຢ່າງ​ລະອຽດ ​ເຊິ່ງ​ໄລຍະ​ນີ້ ກໍ່​ເນັ້ນ​ໜັກ​ໃຫ້​ນັກ​ກິລາ​ເຝິກ​ເອົາ​ພະລະ​ກຳລັງ, ​ເທັກ​ນິກສະ​ເພາະຕົວ​ໃນ​ການ​ແກ້​​ເກ​ມ ​ແລະ ການ​ສ້າງສັນ​ເກ​ມ. ​​ເຖິງ​ຢ່າງ​ກໍ່ຕາມ, ​ໃນ​ເດືອນ​ກໍລະກົດ​ທີ່​ຈະ​ມາ​ເຖິງ​ນີ້ ສະຫະພັນ​ເປ​ຕັງ​ແຫ່ງ​ຊາດ ຈະ​ໄດ້​ສົ່ງ​ທັບ​ນັກ​​ໂຍນ​ລູກ​ເຫຼັກ​ທີ​ມຊາດ​ລາວ ​ເດີນທາງ​ຂ້າງ​ແມ່​ນໍ້າຂອງ​ໄປ​ທົດ​ສອບ​ຄວາມ​ພ້ອມ​ ​ແລະ ​ແລກປ່ຽນ​ບົດຮຽນ​ຮ່ວມ​ກັບ​ນັກ​ກິລາ​ຈາກ​ປະ​ເທ​ດ​ໄທ.

ທ່ານ ​ແສງ​ເພັດ ສີ​ບຸນ​ເຮືອງ ກ່າວ​​ອີກ​ວ່າ: ການ​ແຂ່ງຂັນ​ກິລາ​ເປ​ຕັງ ງານ​ມະຫາ​ກຳ​ກິລາ​ຊີ​ເກ​ມ ຄັ້ງ​ທີ 29 ທີ່​ປະ​ເທດ​ມາ​ເລ​ເຊຍ ຄັ້ງ​ນີ້ ຄາດ​ວ່າ ຈະ​ມີ​ນັກ​ກິລາ​ໃນ​ຂົງ​ເຂດ​ອາ​ຊຽນ 11 ປະ​ເທດ ​ເຂົ້າ​ຮ່ວມ ​ແລະ ຈະ​ມີ​ການ​ຊີງ​ໄຊ​ກັນ​ທັງ​ໝົດ 7 ຫຼຽນ​ຄຳ ປະກອບ​ມີ ປະ​ເພດ​ດ່ຽວ​ຍິງ-ຊາຍ, ທີ​ມ ຄູ່​ຍິງ-ຊາຍ, ທີ​ມຄູ່​ປະສົມ, ທີ​ມຊຸດ ຍິງ 2 ຊາຍ 1 ​ແລະ ທີ​ມຊຸດ ຍິງ 1 ຊາຍ 2, ​ໃນ​ນີ້ ທັບ​ນັກ​ກິລາ​ປຕັງ​ທີ​ມຊາດ ຈະ​ສົ່ງ​​ເຂົ້າ​ຮ່ວມ​ແຂ່ງຂັນ 16 ຄົນ, ຍິງ 8 ຄົນ ​ແລະ ຈະ​ລົງ​ແຂ່ງຂັນ​ຄົບ​ທຸກ​ລາຍ ການ. ​ແນວ​ໃດ​ກໍ່ຕາມ, ​ໃນ​ລາຍການ​ດັ່ງກ່າວ ສະຫະພັນ​ເປ​ຕັງ​ແຫ່ງ​ຊາດ ຕັ້ງ​ຄວາມ​ຫວັງ​ໄວ້ທີ 1 ຫຼຽນ​ຄຳ.

ສຳລັບ​ຜົນງານ​ຂອງ​ທັບ​ນັກ​ໂຍນ​ລູກ​ເຫຼັກ​ທີ​ມຊາດ​ລາວ ​ໃນ​ການ​ເຂົ້າ​ຮ່ວມ​ງານ​ມະຫາ​ກຳ​ກິລາ​ຊີ​ເກ​ມ ທີ່​ຜ່ານ​ມາ ​ໂດຍ​ສະ​ເພາະ​ລ້າ​ສຸດ ຊີ​ເກ​ມ ຄັ້ງ​ທີ 27 ທີ່​ສະຫະພາບ​ມຽນມາ ​ເມື່ອປີ 2013 ສາ​ມາດ​ຍາດ​ໄດ້ 4 ຫຼຽນ​ຄຳ ​ແລະ ຊີ​ເກ​ມ ຄັ້ງ​ທີ 28 ທີ່​ປະ​ເທດ​ສິງ​ກາ​ໂປ ປີ 2015 ຍາດ​ໄດ້​ພຽງ 9 ຫຼຽນ​ທອງ.

​ໂດຍ ອ້ວນ​ດຳ