ສະມາຄົມຈີນ ຄວ້າແຊມ ບານບ້ວງ​ຊາ​ຍ ຊີງ​ຂັນ​ທ່ານ​ເຈົ້າ​ຄອງ ສະ​ໄໝ​ທີ 2

ສະມາຄົມຈີນ ຄວ້າແຊມ ບານບ້ວງ​ຊາ​ຍ ຊີງ​ຂັນ​ທ່ານ​ເຈົ້າ​ຄອງ ສະ​ໄໝ​ທີ 2

ການ​ແຂ່ງຂັນ​ກິລາບານບ້ວງຊາຍ ນັດ​ຊີ​ງຊະນະເລີດ ລະຫວ່າງ ທີມສະມາຄົມຈີນ  ພົບ​ກັບ  ທີ​ມ ບໍລິສັດ ນິວລິງ​ລາວ ຄັ້ງ​ນີ້ ​ໄດ້​ມີ​ຂຶ້ນ ​ເມື່ອ​ວັນ​ທີ 13 ພຶດສະພາ ຜ່ານມາ ທີ່​ສະໜາມ​ກິລາ​ບານບ້ວງ ​ໂຮງຮຽນ ມສ ລຽວ​ໂຕ້, ໂດຍ​ໃຫ້ກຽດເຂົ້າຮ່ວມ ​ແລະ ລາງວັນ​ຂອງ ທ່ານ ຄໍາ​ສະຫວັນ ​ໂຄດ​ໄຊ ຮອງ​ຫົວໜ້າ​ພະ​ແນ​ກສຶກສາ​ທິການ ​ແລະ ກິ​ລາ ນະຄອນຫຼວງ​ວຽງ​ຈັນ, ມີ​ປະທານ​ສະຫະພັນ​ບານບ້ວງ​ນະຄອນຫຼວງ​ວຽງ​ຈັນ, ປະທານ​ສະມາຄົມ​ຈີນ, ອຳນາດ​ການ​ປົກຄອງ​ບ້ານ​ຕ່າງ​ໆ, ບັນດາ​ຄູ-ອາຈານ, ຄູ​ເຝິກ ແລະ ນັກກິລາຈາກ​ພາກສ່ວນ​ຕ່າງ​ໆ ອ້ອມ​ຂ້າງ​ນະຄອນຫຼວງ​ວຽງ​ຈັນ ຕະຫຼອດ​ຮອດ​ຜູ້​ໃຫ້ການ​ສະໜັບສະໜູນເຂົ້າ​ຮ່ວມ.

ຜ່ານ​ການ​ແຂ່ງຂັນ​ຜົນ​ປາກົດ​ວ່າ: ທີ​ມສະມາຄົມ​ຈີນ ສາມາດ​ຮັກສາ​ຟອມ​ເກັ່ງ​ໄລ່​ເອົາ​ຊະນະ   ທີ​ມບໍລິສັດ ນິວລິງລາວ ​​ໄປ​ແບບ​ສຸດ​ມັນ 75-65 ຄະ​ແນນ ຄວ້າ​ແຊ໋ມລາຍການ​ນີ້​ໄປ​ຄອງ​ສະ​ໄໝ​ທີ 2 ຕິດ​ຕໍ່​ກັນ. ສ່ວນ ທີ​ມນິວລິງ​ລາວ ​ໄດ້​ພຽງ​ອັນ​ດັບ​ທີ 2, ທີ 3 ທີ​ມມິດຕະພາບ ​ແລະ ທີ 4 ທີ​ມອິນ​ເຕີ​ຟາ​ມາ. ສຳລັບ​ປະ​ເພດ​ເຍົາວະ​ຊົນ​ຊາຍ ທີ 1 ມສ ລຽວ​ໂຕ້, ທີ 2 ມສ ວຽງ​ຈັນ, ທີ 3 ​ໂຮງຮຽນ​ກຽດຕິ​ສັກ​ນາໆ​ຊາດ, ທີ 4 ທີ​ມບີ​ອາ​ວັນ. ສ່ວນທີ​ມຍິງ ທີ 1 ທີ​ມ ມສ ລຽວ​ໂຕ້, ທີ 2 ​ໂຮງຮຽນ​ກຽດຕິ​ສັກ​ນາໆ​ຊາດ, ທີ 3 ມສ ວຽງ​ຈັນ ​ແລະ ທີ 4 ​ໂຮງຮຽນ​ອິສ​ເຕີນ​ສະ​ຕາ.

ການ​ແຂ່ງຂັນ​ຄັ້ງ​ນີ້ ນອກຈາກ​ຈະ​ເປັນ​ການ​ສ້າງ​ຄວາມ​ສາມັກຄີຮັກ​ແພງ​ໃຫ້ກັບຄະນະ​ກິລາ​ດ້ວຍ​ກັນ​ແລ້ວ ຍັງ​ເປັນ​ການສະ​ເຫຼີ​ມສະຫຼອງວັນ​ກໍາມະກອນ​ສາກົນ ຄົບຮອບ 131 ປີ (1 ພຶດສະພາ 1886 ຫາ 1 ພຶດສະພາ 2017) ​ໃຫ້​ມີ​ບັນຍາກາດ​ຟົດ​ຟື້ນ​ມ່ວນ​ຊື່ນ ພ້ອມ​ທັງເປັນ​ການ​ກະກຽມ​ຄັດ​ເລືອກ​ເອົາ​ນັກກິ​ລາ ​ທີ່​ມີ​ຄວາມ​ສາມາດ​ໂດດ​ເດັ່ນພາຍ​ໃນ​ນະຄອນຫຼວງ​ວຽງ​ຈັນ ​ເຂົ້າ​ຮ່ວມ​ງານ​ມະຫະກໍາ​ກິລາ​ແຫ່ງ​ຊາດ ຄັ້ງ​ທີ 11 ທີ່​ແຂວງ​ຊຽງ​ຂວາງ ​ເປັນ​ເຈົ້າພາບທ້າຍ​ປີ 2018 ອີກ​ດ້ວຍ. ສຳລັບການແຂ່ງຂັນບານບ້ວງດັ່ງກ່າວ  ມີ​ການ​ຊີງ​ໄຊ​ກັນ​ທັງ​ໝົດ ​ມີ 3 ລາຍການ ຄື: ຮຸ່ນ​ເຍົາວະ​ຊົນ​ ຊາຍ-ຍິງ ອາຍຸ​ບໍ່​ເກີນ 18 ປີ ​ແລະ ຮຸ່ນ​ທົ່ວ​ໄປຊາຍ. ​ໃນ​ນັ້ນ ຮຸ່ນ​ເຍົາວະ​ຊົນ​ ຊາຍມີ 8 ທີ​ມ ​ແບ່ງ​ອອກ​ເປັນ 2 ກຸ່ມ ຄື: ກຸ່ມ ກ ປະກອບ​ມີ ​ໂຮງຮຽນ ມປ ສີ​ສັດຕະນາກ, ​ໂຮງຮຽນ ກຽດຕິ​ສັກນາໆຊາດ 1, ລີ​ມິກ ​ແລະ ມສ ລຽວໂຕ້; ​ກຸ່ມ ຂ ມີໂຮງຮຽນ ກຽດຕິ​ສັກນາໆຊາດ 2, ບູ​ເດ​ວິວ, ມສ ວຽງ​ຈັນ ​ແລະ ວີ​ອາ​ວັນ; ຮຸ່ນ​ເຍົາວະ​ຊົນ​ ຍິງມີ 4 ທີ​ມ ປະກອບ​ມີ ມສ ລຽວໂຕ້, ມສ ວຽງ​ຈັນ, ໂຮງຮຽນກຽດຕິ​ສັກນາໆຊາດ ​ແລະ Legend. ຂະນະ​ທີ່​ຮຸ່ນ​ທົ່ວ​ໄປ​ຊາຍມີ 8 ທີ​ມ ​ແບ່ງ​ອອກ​ເປັນ 2 ກຸ່ມ ຄື: ກຸ່ມ ກ ມີ ​ໄຊ​ລັດ​ມໍ​ເຕີ, ລາວ​ເອ​ເຊຍ​ແກັດ, ​ເພັດ​ດາວ​ວົງ​ກໍ່ສ້າງ ​ແລະ ສະມາຄົມ​ຈີນ. ສ່ວນ​ກຸ່ມ ຂ ມີບູ​ເດ​ວິວ, ອິນ​ເຕີ​ຟາ​ມາ, ບໍລິສັດ ນິວ​ລິງລາວ ​ແລະ ທີ​ມມິດຕະພາບ ​ໂດຍ​ໄດ້​ຮັບ​ການ​ສະໜັບສະໜູນ​ຈາກ ບໍລິສັດ ວຽງ​ທອງ​ ການ​ຢາ ຈໍາກັດ ມູນ​ຄ່າ 25 ລ້ານ​ກີບ ພ້ອມ​ດ້ວຍ​ຜູ້​ໃຫ້ການ​ອຸປະຖໍາ​ອີກ​ຈໍານວນ​ໜຶ່ງ.

ຂ່າວໂດຍ: ອ້ວນ​ດຳ